🙏तस्मै श्री गुरवे नमः 🙏

              गुरुर्ब्रम्हां गुरुर्विष्णु, गुरुदेवो महेश्वर…
              गुरु साक्षात परब्रह्म, तस्मै श्री गुरवे नमः

         

आज गुरूपोर्णिमा... गुरूपोर्णिमा हि सद्गुरूंची पोर्णिमा मानली जाते.  पोर्णिमा म्हणजे प्रकाश.... गुरु शिष्याला ज्ञान देतात. तो ज्ञानाचा प्रकाश आपल्यापर्यंत पोहोचावा, म्हणून गुरूची प्रार्थना करावयाची, तो दिवस म्हणजे गुरूपोर्णिमा.
          आपल्या आयुष्यात जन्माला आल्यापासून लाभलेले पहिले गुरू म्हणजे आपले आईवडिल. आपल्याला जगात ताठ मानेने जगायला शिकवतात ते आपले आईवडिल. जगात सर्व गोष्टिंशी लढण्याची ताकद आपल्याला आईवडिलांकडून मिळते. आईवडिल हे आपलं आयुष्य घडवणारे पहिले गुरू असतात. त्यानंतर दुसरे गुरू म्हणजे शाळेतील आणि महाविद्यालयातील शिक्षक. ज्यांच्यामुळे आपल्याला शैक्षणिक आयुष्य घडवण्यास मदत होते. त्यांच्याकडून आपल्याला शिस्तीचे धडे शिकायला मिळतात जे आपल्याला प्रत्येक प्रगतीच्या पावलोपावली उपयोगी पडतात.

        

   

             प्रत्येकाच्या आयुष्यात हे दोन मुख्य गुरू असतातच पण त्या हि व्यतिरिक्त आपल्या आयुष्यात अनेक व्यक्ती येतात. ज्यांच्याकडून आपण अनेक गोष्टी कळत नकळतपणे शिकत असतो , आणि त्यांच्या त्या शिकवणीतून ते आपले आदर्श बनतात. आणि त्यांचे आदर्श डोळ्यासमोर ठेवून आपण प्रगतीच्या पथावर खंबीरपणे आपला प्रवास सुरू करतो. असाच आदर्श डोळ्यासमोर ठेवून मी देखील माझ्या नृत्य प्रवासाला सुरूवात केली. माझं नृत्य प्रवासातील आदर्श व्यक्तीमत्व म्हणजे माझी गुरू सौ.दर्शना अमित खामकर. आम्ही सर्व तिला ताई म्हणतो. अत्यंत जबाबदार, हुशार, कर्तबगार असे हे व्यक्तिमत्व आहे. तिच्या कडून उत्तम कथ्थक नृत्य तर शिकायला मिळतं पण त्याच बरोबर जिद्दीने व चिकाटीने एखादी गोष्ट पूर्ण करण्याचे धाडस हि मिळते. नोकरी, घर, संसार हे सर्व अगदि उत्तमरीत्या सांभाळून आपली आवड देखील उत्तमरीत्या सांभाळू शकतो हे तिच्या कडून शिकण्यासारखे आहे. सौंदर्य, पैसा, नोकरी, गुणवत्ता ह्यांचा कधी हि माज नसलेली अत्यंत सौम्य स्वभाव असलेली अशी हि आमची ताई. नेहमी चेहर्यावर हसू ठेवणारी,आपल्याकडे असलेल्या कलेचा इतरांना मनमोकळेपणाने आस्वाद चाखू देणारी अशी हि आमची ताई.
        

     

        मला ताईच्या डान्स क्लासला येऊन ४ वर्षे झाली. मातीतून जश्या सुंदर मूर्त्या मूर्तीकार तयार करत असतो तसचं ताई आमच्या सारख्या Non Dancer's मधून एक उत्तम Dancer's घडवते. नृत्यात ९ रस असतात. शृंगार, भय, हास्य, बीभत्स, करुण, वीररस, अद्भुत, रौद्र आणि शांत ह्या नऊ रसांची परीपूर्ण अशी मूर्ती म्हणजे दर्शना ताई. नाच करताना तिला अगदि टक लावून बघतचं रहावसं वाटतं, तिचा नाच संपूचं नये असंच भारावलेल्या डोळ्यांना वाटत असतं. तिच्यासमोर उभं राहताना एक वेगळीच उर्मी अंगात येते ती म्हणजे आज खूप चांगलं नाचून दाखवायचं. ताईने शिकवलेल्या प्रत्येक गोष्टी ह्या आयुष्यात नेहमी कामी पडतात. मग त्या नृत्यातील असो अथवा इतर. पण त्या नक्कीच कामी येतात.                   

                          

       ताई तुझ्या कडून खूप काहि शिकायचे आहे. तुझ्यासारखी चांगली गुरू मिळण्यासाठी खरचं नशिबाची साथ लागते. Thank you So much ताई आता पर्यंत दिलेल्या सोबतीसाठी. 

             गुरूंच्या उपकारांनी आपले मन कृतज्ञतेने भरून येते, तेव्हा त्यांचा आदर करून त्यांना वंदन करणे हे आपले कर्तव्य असते.
            दर्शना ताई तुला तू दिलेल्या चांगल्या शिकवणीसाठी आदरपूर्वक वंदन करून गुरूपोर्णिमेच्या मन:पूर्वक शुभेच्छा देते. अशीच साथ नेहमी असू देत. तुझ्या आशिर्वादाचा हात नेहमी आमच्या पाठीवर असू देत.

       आदी गुरुसी वंदावे |  मग साधनं साधावे||
       गुरु म्हणजे माय बापं |  नाम घेता हरतील पाप||
       गुरु म्हणजे आहे काशी |  साती तिर्थ तया पाशी||
       तुका म्हणे ऐंसे गुरु |  चरणं त्याचे ह्रदयीं धरू||
     

माझ्या आयुष्यात मला घडवणार्या सर्व गुरूवर्यांचे मी आभार मानते आणि सर्व गुरूवर्यांना गुरूपोर्णिमेच्या खूप खूप शुभेच्छा देते.